領匯齋勸縱容無牌小販
無牌小販公然擺賣，領匯僅「勸喻」了事！將軍澳尚德邨居民許先生指每晚下班途經尚德商場時，均發現有無牌小販在商場與屋邨之間擺賣，不但阻礙居民出入，更擔心食物會「食壞人」，「啲嘢食都唔知邊度攞番嚟，同領匯同食環署講，佢哋都唔理，搞到條邨烏煙瘴氣！」
食物環境衞生署發言人接獲本報查詢後，僅指會交予領匯處理及回覆。
領匯發言人則證實，發現有無牌熟食小販在尚德商場與屋邨之間擺賣，強調商場辦事處已安排保安員在轄下範圍內加強巡查，並勸喻無牌小販離開。發言人續稱，會繼續密切監察情況，有需要時會向有關政府部門尋求協助。
「食環署話交畀領匯處理，但領匯又冇執法權力，即係由得啲小販繼續喺度，（部門）係咪真係要出咗事先肯理？」許先生要求當局正視無牌小販問題，保障居民利益及安全。
（ireport_00031655）