大時大節當然最好冇病冇痛普天同慶啦，之不過人體結構呢家嘢好奇怪，聖誕新年大吃大喝之後總會貴體違和，少不免頭暈身慶甚至屙嘔肚痛。如果啱啱遇着剛剛，病發嘅時候係三更半夜，冷冷清清悽悽慘慘慼慼，點算好呢？通常有三個辦法啦，一係頭暈暈幫襯夜診私家醫生，二係腳震震走去公立醫院急症室求診，三係傻更更乜都唔做大覺瞓。
民建聯上星期做過一項調查，訪問咗接近六百個市民，結果顯示如果深夜感到不適，大約七成受訪者會選擇去公立醫院急症室，只有一成多人會幫襯夜診私家醫生。又唔係斷手斷腳頭破血流，病得唔係好緊急因乜事幹都要去急症室？超過三成人解釋，因為搵唔到私家夜診，亦有兩至三成人認為地點就近，而且急症室收費比較便宜。
好嘞，閣下病得唔係好緊急吖嘛，急症室嘅醫護人員當然唔同你急。有人由於經常無端端發燒，四日之內有兩晚去廣華醫院急症室求診，第一次排咗四個多小時都等唔到，第二次等足七粒鐘先至終於見到醫生。
做完調查之後，民建聯負責人就話嘞，公立醫院夜間門診晚上十點鐘就收工，關門謝客時間太早，令到急症室壓力增加。所以民建聯提出建議，醫管局先喺人流較多嘅急症室，例如廣華、屯門以及威爾斯親王醫院試行深宵門診，如果成效好再擴展到其他公立醫院。
呢嗱嗱嗱，醫管局成日都抱怨市民濫用急症室，千方百計又收費又分流，務求減少醫護人員嘅工作量。之不過問題係，病人除非真係傻更更乜都唔做大覺瞓，否則半夜三更病發到天旋地轉，霎時之間確係好難搵私家醫生喎，去二十四小時營業嘅急症室求診未嘗唔係一個相對合理嘅選擇。既然係咁，醫管局係咪應該急民之所急，從善如流增設深宵門診呀？急症室冇錯係唔應該濫用，但係冇得揀嘅時候就要病急亂求醫㗎啦，反正納咗咁多年稅，攞番少少醫療福利都好吖。
計功夫茶話齋，除非夜診私家醫生多到好似便利店咁樣總有一間喺左近，否則公立醫院增設深宵門診真係有實際需要o架，只要夜間工作嘅醫護人員唔係斷錯症、開錯藥或者輸錯血，唔會因為瞌眼瞓而造成更加多嘅醫療事故，深宵門診肯定係一項德政。
不如咁嘞，食衞局局長高永文自己做一個實驗，大時大節盡量大吃大喝搞到身體不適，三更半夜落街睇下搵唔搵到夜診私家醫生，如果搵唔到又唔好意思騷擾急症室，咁就最好下令要求公立醫院增設深宵門診啦！