民政事務局局長曾德成同前政務司司長林瑞麟嘅囝囝，現身愛護香港力量（愛港力）飯局「挺梁」？有網上討論區早前上載「挺梁」團體愛港力上月網民聚餐嘅相片，更言之鑿鑿話其中兩個出席嘅人係「疑似林公公個仔」同「曾局長個仔」。驟眼望其中一人嘅五官輪廓，的確同林瑞麟有幾分相似，而「曾局長個仔」嘅樣貌，更同曾德成餅印一樣，唔怪得網民有咁大疑惑啦！不過，據我哋所知，曾、林二人分別只有女兒，所以今次誤傳確係得啖笑。
另外，我哋尋日報道愛港力搞嘅網民聚餐，連自家制服都出動埋，加上有傳上述所講嘅「官二代」現身撐場，難免令人揣測佢哋背後有大水喉贊助。
不過，有愛港力成員強調，當晚聚餐每人需自費一百七十元，絕冇大水喉贊助。另一組織「齊心行動」亦稱，佢哋並非由「梁粉天地」發起，亦同愛港力冇聯繫，查實佢哋係由全港不同階層、不同行業嘅小市民發起，亦冇政治取向及政治背景，全部係出於善意同真心。