唔少政界人士都會喺書展期間出書，主要作用唔係賺錢，而係希望保持知名度，兼且順便吸納粉絲支持，好似行政會議成員、新民黨立法會議員葉劉淑儀都有出書教英文。我哋翻查行會成員申報紀錄，最近葉太就申報自己成立一間「博雅人文服務有限公司」，佢話成立公司可以方便處理自己啲著作版權。
原來葉太至今已經出過五本書，既有其個人史詩式嘅個人傳記，亦有抒情式嘅散文集，當然仲有佢最耍家教人英文嘅工具書啦！嚟緊打算繼續出書嘅葉太話，有律師建議佢成立公司負責所有出版事務，將來無論係版權收益定係印刷開支，都可以撥歸公司處理，所以佢喺上月廿九日向行會申報成立呢間公司。
除咗葉太外，運輸及房屋局局長張炳良都喺上月十三日向行會申報，不再持有佳富貿易有限公司嘅百分之三點三四股權，呢間公司身份好神秘，喺油尖旺持有一個商業物業，股東仲有從事公關嘅民主黨盧子健、該黨前副主席狄志遠及前立法會議員李華明等，佢哋都係民主黨前身嘅匯點時期嘅政治人物，而張炳良多年前更加係匯點主席，唔知係咪驚敏感，所以張炳良先放手唔玩呢？