政情：睇準經濟低迷 陳耀璋掃西班牙筍盤
已故教育家陳樹渠兒子陳耀璋（Anson）投資有道，收租物業遍布香港，但佢近日就睇準西班牙經濟低迷，有意越洋購入優質物業長揸，仲趁聖誕節遊當地探路。Anson話，西班牙喺○七年時曾意氣風發，風光一時，估唔到受歐債危機拖累，經濟急轉直下，正係時間執平貨。
留學加州 懂西班牙語
不過，Anson認為投資同追女仔一樣，唔可以咁「擒青」，切忌聽經紀「齋Talk」，所以佢做足功課，深入了解當地法制。今次初探路，Anson會先與好友考察當地房地產市場，如果遇啱筍盤，佢聲言會豪擲三至五億港元投資都冇問題。除咗西班牙外，英國、法國或意大利，佢都有意投資。
講到西班牙，原來Anson對呢隻「牙」情有獨鍾，最愛係小食Tapas。原來佢中學時曾留學加州，講得一口流利西班牙語，今次去到當地，絕對大派用場喇。