政情：劉江華返工四日 即過局長癮
政府選擇喺「世界末日」前公布委任民建聯劉江華做政制及內地事務局副局長，末日冇降臨，佢於是喺上周五如期履新。雖然劉江華做副局長惹來政界議論紛紛，但更爆嘅係原來佢埋咗位僅四日就即署任局長，由二十五號署任到三十號為止，有可能係上任最短時間就署任局長職務嘅副局長。
趕唔切同日刊憲
如果大家呢兩日喺電視見到劉江華掛住「署理局長」嘅牌頭出鏡，千祈唔好嚇親，其實只係政制及內地事務局局長譚志源（Raymond）聖誕節休假，所以劉江華先至署任局長一職。署任安排喺星期二已經開始咗，但聽聞因為劉江華上星期五先至履新，趕唔切同日刊憲署任安排，所以會喺明日嘅憲報補番。
回想劉江華上任首日，先多次表示會努力學習、虛心聆聽，點知學咗僅四日就旋即署任局長，初嘗局長滋味。不過，相信最多人關心嘅係，究竟劉江華做署理局長嗰幾日係咪照收局長人工呢？原來問責官員之間署任係冇補水嘅安排，所以劉江華署任局長期間仍然照袋副局長人工，即係十八萬！
除咗Raymond外，其實唔少局長亦趁聖誕節休息吓，攞多幾日假就可以放個跨年假期，暫時已知放假嘅有保安局局長黎棟國、運輸及房屋局局長張炳良及教育局局長吳克儉，已佔問責團隊三分一，而四個局長嘅工作都係由副局長署任，原來副局長嘅一大功能就係署任放假嘅局長。
署任安排非必須
雖然問責局長每年支取納稅人過百萬元年薪，但納稅人身為老闆，要知道局長有冇返工竟然唔係咁容易，除非局長放假時有署任安排，否則局長放假都毋須刊憲。至於幾時需要有署任安排，其實都冇硬性規定，只要局長覺得自己仍然可以履行職責就唔使署任，所以署任安排一直備受批評。
最經典嘅例子莫過於○八年港人喺泰國嘅包機事件，時任保安局局長李少光因身在外地，出現缺勤真空情況，令滯留港人遲遲未有機位返港，雖然當時李少光堅稱自己日日睇住情況隔空指示，當然結果係點大家有目共睹啦。