中環出更：買富士蘋果 揀選有秘訣
自從內地生產嘅富士蘋果被揭發濫用違禁農藥之後，一眾食家只好選購其他產地嘅富士蘋果。縱橫遊業務顧問袁振寧（CN）最近就喺網上發起團購，大手買入日本青森縣生產嘅富士蘋果，而青森縣一班政府官員早前亦親自來港推介當地物產。
外皮要有瑕疵
青森縣縣長三村申吾教路，揀選靚蘋果嘅秘訣，外皮唔好太完美，事關農藥落得太重手至會冇瑕疵，仲有要睇蘋果個底部，因為底部愈圓愈香甜喎。
CN話，富士係蘋果嘅品種之一，淨係日本就有好多唔同地方種植，雖然青森縣種植嘅蘋果賣相唔係最靚，但係甜度達十四度，咬落爽脆清甜，佢都柯打咗兩箱派畀親友。甜度咁高，難怪三村申吾都建議唔好一日內食太多，否則就好易有糖尿病喇！