中環出更：蘇家碧坐正做工總CEO
送舊迎新嘅關鍵時刻，「屈就」工業總會總經理一職逾半年嘅前高官蘇家碧（Linda），終於收到政府通知確認，一月二日就捱完高官再就業「冷河期」，元旦假期後將坐正做工總行政總裁（CEO）。喺Linda過冷河期間，同工總主席鍾志平輪流做署理CEO嘅工總副主席劉展灝（Stanley）就好開心話，佢哋終於可以卸任CEO喇！
Stanley尋日同卓妮證實，早前Linda已收到政府回覆，工總即刻啟動任命程序，已於十二月份例行理事會上通過有關任命，眾人當係收到聖誕禮物咁開心。雖然Linda喺冷河期唔可以出席公開活動，但佢都好勤力，凡係工總內部活動必定見到佢嬌小嘅身影。早前佢就出席工總青委聯歡派對，仲戴上高帽及綵帶玩埋一份，全情投入，同場仲有做環保生意嘅鄭文聰及郭振華兩位副主席。
青委主席孫榮聰（Eric）、副主席劉燊濤（Gary）等年輕人都踴躍出席。不過，Eric就喺派對前夕，突然胃抽筋入院大檢查，擾攘一番，好彩最終冇咩事。當晚Gary太太吳奕筠亦有到場。啱啱結婚一周年嘅Gary話，明年四月將趁去瑞士參加鐘錶展之便，同太太拍拖暢遊浪漫花都巴黎，佢笑稱，自從話想生BB之後，受到來自親友好大嘅壓力。
青委關注貧富懸殊
當晚眾人盡情跳舞、玩大抽獎之外，都趁機義賣福袋。Eric話，佢哋好關注社會貧富懸殊問題，現正打算下月底喺九龍塘又一城嘅戲院包場，請貧困家庭嘅小朋友免費睇電影。身兼深水埗區議會主席嘅郭振華勁讚建議夠正氣，應承幫手物色區內小朋友去睇戲添！
卓妮