歌仔都有得唱啦，受騙的那個比騙徒更混帳，所以上當嘅傻瓜唔一定值得同情o架。情況就好比政客同選民嘅關係，明知「政工作者」口甜舌滑呃神騙鬼o架啦，選民上當上當再上當仍然投票畀佢，戇居得實在比騙徒更混帳。
內地有一個容易受騙的同胞，四十一歲人唔知點解腦囟未生埋竟然相信六合彩有必勝秘笈。呢一位姓余嘅老哥今年三月收到一個來自香港嘅電話，對方自稱馬會職員，話有預測每期六合彩號碼嘅貼士光碟提供，中獎率萬無一失百分百，索價十五萬八千大元。余仁兄好似無知少女相信茅山師傅有本事上床改運一樣，堅信不移咁按照對方嘅仙人點路，將錢存入中國農業銀行指定帳戶，然後收到一張光碟。
乜嘢光碟咁神通廣大呀？功夫茶唔使睇都知道係山草藥亂噏嘅山寨版貨色啦，呢一位戇男睇完先至如夢初醒發覺自己做咗老襯。好嘞，老襯哥哥怒從心上起，惡向膽邊生，你估佢有乜嘢報仇大計吖嗱？嘩嘩嘩，勁勁勁，佢一二三衝落香港找馬會晦氣，專程去到跑馬地體育道一號馬會總部大樓同職員理論，要求討回受騙嘅公道。遷怒馬會唔止一次，而係兩次，今年十月討公道不得要領，前日捲土重來又去馬會交涉，驚動警方到場調查。
騙案苦主找馬會晦氣講得通咩？打個譬喻吖，有人冒認美國總統奧巴馬花言巧語誘騙婦孺獻身，你冇理由走去白宮緝拿奧巴馬歸案啫，一淫做事一淫當，騙色另有其人呀！
灣仔警區刑事調查隊跟進後表示，由於案件屬於內地發生嘅罪行，並非香港司法管轄範圍，加上受害者一直無法提供有關光碟，所以無法進一步追查。香港賽馬會發言人就話嘞，馬會對懷疑六合彩騙案深表關注，並謹此鄭重聲明，今次事件與馬會無關。
計功夫茶話齋，博彩受騙當然係衰戇居啦，之不過咁，散播地下六合彩賭禍嘅不法之徒亦係罪孽深重。喂，內地同胞真係好多人沉迷地下六合彩o架，有人迷到跳樓自殺，有人輸到家破人亡。開賭嗰一班吸血鬼固然係害人精，唔好唔記得發行六合彩報提供所謂貼士嘅奸商同樣係殘民自肥。好衰唔衰奸商之一係香港人，荼毒內地嘅三份港產六合彩報《創富》、《貼士皇》以及《六合皇》，同壹傳媒黎智英有千絲萬縷嘅關係，三報都曾經由黎智英旗下嘅公司擔任承印人多年。換言之，淫賤黎先至係地下六合彩賭禍嘅始作俑者！
不如咁啦，余仁兄以慘痛經歷告誡世人，唔好輕易信人，唔好沉迷賭博，唔好包庇奸商，地下六合彩禍國殃民呀！