服務性行業嘅資產就係員工，作為管理層如果肯善待員工，自然氹得員工仆心仆命効力，相反冇士氣之餘，更可能被員工「唱通街」。
講緊嘅係做開某服務性行業、代號「姑爺」嘅高層，話說佢喺呢行都有頭有面，但佢為人作風同名聲真係不成正比，事關佢出名孤寒刻薄，最經典嘅係將花紅攤開十二個月發放，倘有員工唔小心返工遲到一次，剩番未發放嘅花紅就化為烏有，呢招真係夠晒絕。
「姑爺」刻薄員工嘅招數又點只咁少，據聞喺佢領導下嘅員工福利一年少過一年，使人做嘢唔使本，搞到班員工食飯時間都要趕頭趕命。不過，最令班員工氣頂嘅係，本身有老婆嘅「姑爺」喺公司有位紅顏知己，呢位紅顏知己又恃住有高層撐腰就「揸住雞毛當令箭」，時不時恃勢凌人，搞到一眾員工要雙重受氣。
據聞呢位紅顏知己人前人後恃住有份管住盤數，只要有人使多一蚊都罵聲不絕，最絕嗰招係如果唔妥邊個員工，佢會諗盡辦法逼佢自動辭職，員工唔就範嘅話，佢更加會一路寫衰份員工評核，變相令呢位員工第時搵工都有困難，但礙於佢大權在握，一眾員工惟有私底下互相呻吓消消氣。