每逢聖誕新年的長假期，又係一眾立法會議員外出旅行叉電嘅好時機。幾年未放過假嘅民建聯葛珮帆（EQ）就決定暫時放低工作，呢段時間同老公去埃及旅行，直至年底先返港過除夕。EQ大呻呢幾年選舉一個接一個，根本冇時間好好休息，原本去年區議會選舉後應承陪老公去旅行，老公仲好開心訂好晒機票同酒店，但點知最後都係因事而無法成行，搞到老公要好無癮咁自己一個人去玩。
EQ話，同老公早排計劃聖誕節去邊度旅行嘅時候，兩人都異口同聲咁話想去啲唔凍嘅地方旅行，加上佢哋都鍾意影相，於是就決定去埃及睇法老王同金字塔，順便坐船遊尼羅河。不過，去過埃及一次嘅EQ覺得當地並唔係一個理想嘅旅遊地方，事關當地唔少景點充斥專做遊客生意嘅小販，經常會纏住啲遊客兜售。
EQ憶述，上次去埃及開會後，本來諗住順道睇埋金字塔，點知未睇到金字塔，當地人已經一擁而上叫佢買嘢，所以對埃及嘅印象唔太好。但佢話今次係同老公一齊去，希望會改觀。