政情：「華哥」自製短片賀聖誕
今個聖誕佳節，你收到幾多張聖誕卡？相信多數人一隻手指就數晒，事關科技已改變世界，用手機傳送賀節短片成為時下潮流。前鐘錶業總會主席兼喜運佳常董梁青華不甘於轉發來歷不明嘅短片，一於花幾千元度身訂造「華哥Style」賀節短片，結果喺城中老友之間瘋傳，個個都like爆。
日前喺馬場見到香港傳藝中心校長吳子文（William）夫婦及太子珠寶執董朱繼陶，佢哋都急不及待開手機推介華哥條賀節短片，短片由華哥與愛駒「張家界」領銜主演，長約六十秒，片中「張家界」取代麋鹿，拉住扮聖誕老人嘅華哥及禮物，唔小心跌入馬房煙囱，於是變身牛仔嘅華哥同眾騎師齊跳熱到爆嘅騎馬舞，片尾仲有華哥真人把聲祝各位聖誕快樂，親切感十足，難怪一向支持原創設計嘅William勁讚不已，仲叫華哥去登記版權添！華哥就預告，嚟緊仲有元旦版及春節版添呀！
