政情：愛港團體撐CY
特首梁振英（CY）上任以來就山頂大宅僭建問題一直受到泛民主派狙擊，先後喺立法會提出不信任動議及動議用權力及特權法調查僭建事件，雖然兩項動議都被否決，但CY仍要面對泛民喺元旦日發起嘅「倒梁」遊行及明年初討論嘅彈劾動議。雖然「倒梁」聲音不絕，但近日亦冒起咗唔少神秘組織撐政府同撐CY，佢哋一樣喺諮詢會叫口號，一樣會上街，實行「你有張良計，我有過牆梯」，抗衡倒梁聲音獨大。
CY上任以來經常話要落區聽市民聲音，但每次都被反對派踩場搞亂檔，令到唔少想發聲嘅市民不滿。不過，近日就突然冒起咗唔少「挺梁」團體，除咗經常喺電台節目《城市論壇》見到嘅「愛港之聲」外，仲有「愛護香港力量」（愛港力）。CY早前喺地區搞嘅施政報告及財政預算案諮詢會，愛港力都有到場聲援，愛港力同愛港之聲喺嚟緊周日同元旦仲會舉行撐CY遊行及「愛香港、撐CY」嘉年華，實行同泛民嘅「元旦倒梁遊行」對撼。
定位各有不同
除咗泛民陣營自己各有黨派之外，各個「挺梁」團體亦非同出一轍，好似「梁粉天地」同近日發起「齊心簽名撐CY」行動嘅「齊心行動」，兩個組織都同愛港力有分別。「齊心行動」向來自稱只係普羅市民、冇組織、冇靠山嘅，較主張行溫和路線。有該行動成員坦言，就算喺佢哋統籌之下嘅幾個組織，大家嘅定位都有啲唔同。
不過，無論係愛港力或「愛港之聲」，又或者「齊心行動」等，相信都係目標一致撐CY為首嘅政府，但至於佢哋嘅成員身份同背景始終係個謎，究竟係大家志同道合走埋一齊，抑或係背後有人拉雜成軍都冇人知。唯一知道嘅係最近愛港力搞咗個網民晚餐聚會，成員仲着晒愛港力自家制服，看似財力充足，究竟成員自己夾錢聯歡吖？抑或係背後有條大水喉贊助呢？直至截稿前仍未搵到佢哋嘅成員回應。