中環出更：李應生推介鱷魚肉進補
天氣咁凍，最好進補暖吓身，但物價飛漲，靚蟲草、鹿茸等補品真係貴到得人驚。然而百成堂集團主席李應生（Tommy）就話，平有平補，貴有貴補，深諳養生之道嘅佢，推介大家食鱷魚肉，話可以煲湯又可以入饌，最緊要係價錢大眾化喎。
價格相宜 渾身是寶
Tommy話，鱷魚肉有益肺止咳嘅功效，仲可以補血補腎，冬天最好用鱷魚乾煲靚湯，加埋百合、淮山、川貝、蜜棗、瘦肉一齊煲，啖湯又甜又滋潤，一家大細都啱飲。唔飲湯，食鱷魚肉都得，Tommy話，鱷魚肉渾身是寶，鱷魚扒、爪、皮都食得，既美味又低脂、低膽固醇，仲有好重膠質，最適宜用來燜煮。
佢仲話，以前鱷魚肉進貨量少，價格相對較高，會有人以蜥蜴肉冒充出售。不過，依家多咗人識食，廣州、印尼、泰國等地都有急凍鱷魚肉輸港，價錢變得相宜，大家可以放心食喇。Tommy最近新擔任中華總商會嘅會員聯絡委員會主席，加埋香港優質旅遊服務協會主席一職，年尾忙到飛起，唔知佢有冇飲多幾啖鱷魚湯補吓身呢？