中環出更：博愛慈善舞會 司徒法正「被圍」
過完聖誕又好快到除夕夜，博愛醫院一眾董事局成員及城中名流數百人，早前就喺尖沙咀洲際酒店舉行博愛慈善餐舞會，為今年嘅善款數字再創佳績。主席潘德明、候任主席曾耀祥等高層空群而出，而食物及衞生局局長高永文、前博愛主席湯修齊夫婦、知名嘅風水命理專家司徒法正都有捧場。司徒法正一現身，即刻被賓客包圍，爭相請佢指點迷津。
卓妮都想知道明年投資策略宜攻定宜守？司徒法正話，明年年初樓市將進入低潮，想投資嘅市民要忍手，金融市場前景反而唔錯，建議市民可以喺股市「發揮吓」，但係隨意玩吓好喇，千祈咪太瞓身。港人鍾意出埠旅遊，大師就告誡話，東北位置（即係日本）仍然有地震，市民出遊應該小心啲喎！
生意愈做愈大嘅博愛副主席兼衍生行老闆彭少衍話，養生保健產品嘅競爭好大，所以佢已逐漸收窄戰線，主打兒科、藥品及護膚品市場。佢話衍生行率先推出七星茶及開奶茶，如今連業界老品牌都要加入競爭，所以要打醒十二萬分精神。
潘德明樂做善事
飲食界名人李德麟都去撐主席潘德明場，佢打算喺長沙灣青山道分店派飯，為貧困人士送暖，但會以三至五元嘅象徵式價錢出售，而唔係免費派通街，避免街坊浪費。
至於潘德明做善事就愈做愈興起，最近佢邀請咗三百幾位小朋友到佢位於粉嶺嘅七萬呎村屋玩，佢仲好輕鬆咁話，再多三百個都冇問題呀！
卓妮