「極危」暹羅鱷 速遞到港
【專案組報道】鱷魚速遞話咁易！繼鱷魚貝貝大鬧元朗山貝河後，大埔塘上村垃圾站外又現鱷蹤，一條被列「極危」物種的暹羅鱷懷疑遭人棄養。其實內地盛行飼養鱷魚之風早已吹至本港，本報記者直擊廣州寵物市場，揭發不少店舖公然違規將兇殘鱷魚作寵物出售，只需三百多元人民幣（下同）便可購得一條「BB鱷」。有店舖更提供專為港人而設的一條龍服務，額外支付五百元，便可安排「速遞員」將「BB鱷」偷運來港，聲稱保證成功。
飼養寵物鱷近年在內地大熱，不少人將剛出生的小鱷魚視為寵物；位於廣州花地灣的越和花鳥魚藝批發市場是當地最大寵物市場之一，亦是寵物鱷集中地。在水族區內，除出售一般水族魚外，不少檔口在地上擺滿膠盤放置不同品種的龜類，部分夾雜蠍子、蛇及蛙，更有鱷魚。
生猛十足 張牙舞爪
記者於其中一店的玻璃缸內見有三條小鱷魚，每條約一呎長，索價三百三十元，只見小鱷魚十分生猛，在缸內張牙舞爪。女店主見記者駐足，即上前兜搭：「呢款係泰國鱷魚，佢一啲都唔惡，我好多客都買嚟當寵物養。」說罷，女店主隨即伸手入缸，徒手將小鱷魚拿出來兜售，她說：「你睇！喺後面捉住佢嗰頭，隻手唔好擺喺佢面前，咪唔會咬你囉！」
鱷魚成年後體形難免愈來愈大，不過女店主卻大派定心丸說：「你唔使擔心，你畀個細缸養佢，一個星期餵佢一次，佢就唔會大。」得悉記者來自香港後，女店主突然神神秘秘說會提供另類速遞服務。「你畀多五百蚊，就幫你搵相熟速遞公司，只要綁住鱷魚個口，放落發泡膠箱，佢哋係直接喺羅湖送過香港。」
女店主自言費用較一般速遞貴，「包埋塞畀速遞員嗰啲錢，雖然話綁住鱷魚個口，不過鱷魚喉嚨都會發出嗚嗚聲，都要速遞員詐聽唔到至得o架！」雖然偷運鱷魚在中港兩地均屬犯法，不過女店主自言無有怕：「佢哋（速遞員）知道點做o架啦，捉到點算？梗唔會啦，又唔係第一次，已經運過好多次，好多香港人都係我熟客，包無失手。」
玩無可玩 冒險飼養
「有啲人貪得意，喺內地走私鱷魚返嚟養，養養吓先知大件事。」香港兩棲及爬蟲協會會長楊嘉文表示，過往亦聽聞有另類寵物愛好者玩無可玩，冒險從內地偷運鱷魚來港飼養。「鱷魚唔係咁易養，好多人會養死佢，不過養死算好彩，如果唔係鱷魚愈嚟愈大都唔知點算。我聽過有人見條鱷魚太大，索性劏咗嚟食。」