無驚無險過終點，傳說中嘅世界末日並無發生，太陽照常升起，地球繼續運轉，人類如常生活，香港照舊吵吵鬧鬧，市民依然頻頻撲撲。唔同嘅係，今年聖誕新年大家可能多咗一個特備節目，就係防範流感。
無錯，世界末日無降臨，但係流感高峰期就提早降臨，成為港人末日過後嘅首個公共衞生安全威脅。醫管局預警，隨着天氣轉冷，未來兩周流感求診個案將會繼續攀升，今年一月至七月流感高峰期間，急症室平均每日求診個案高達六千五百宗，比去年同期五千八百宗上升約百分之七。所以話，流感來勢洶洶，絕對唔係危言聳聽o架！
面對流感高峰期，當局點反應呢？佢哋話喎，轄下醫院已制訂不同應變措施，包括增加病床同人手。至於呢輪流感高峰期會持續幾耐，佢哋話難以估計，要視乎病毒會否變種喎。
防疫寧緊勿鬆，當局嚴陣以待係分內之事，最怕就算係分內之事，都隨時做到甩甩漏漏嘅咋。你知啦，衞生官僚防疫劣迹斑斑，講就天下無敵，做就無心無力，佢哋話全力防疫，做齊措施，可信程度有時真係低過世界末日論o架。唔信嘅話，等功夫茶帶大家現場視察，你就知功夫茶唔係杞人憂天嘞。
嗱，講緊嘅咪就係沙田威爾斯親王醫院急症室咯。由於冷鋒殺到，流感侵襲，威院急症室出現人滿之患，到處人頭湧湧，七國咁亂，其中觀察區更加淪為重災區，明明只可以容納二十張病床，家陣居然逼咗四十張，搞到床貼床，病人撞病人。就算運送病人嘅狹窄通道一樣淪陷，排滿病床同輪椅，有病人苦等四日依然上房無期，飽受折騰，慘過走難。
睇到呢啲亂象，大家可能會問，流感最大危機仲未殺到，公立醫院已經倒瀉籮蟹，到疫情大軍兵臨城下，公院防線咪隨時潰不成軍？正如醫學界人士話齋，任由大批病人逼喺有限空間，隨時造成交叉感染，並且傳染埋探病家屬，後果可大可小。衞生官僚抱住末日心態返工，工作求求其其，得過且過，防疫靠佢哋把關，死得啦！
弗備難，難必至。世界末日雖然無發生，但末日論提醒世人居安思危，如果防疫掉以輕心，話唔定真係釀成大災難o架。好心港產官僚打醒精神，認真把關啦，市民避過咗世界末日，如果畀你哋搞出一場世紀浩劫，好荒謬好悲哀啫，吓話？