立法會各黨派平日立場壁壘分明，但近期天氣忽冷忽熱，加上流感高峰期殺到，大家於是無分你我咁跨黨派傳播病菌，唔少議員因而中招。
本周一發展事務委員會離奇流會，事後發現原來有唔少議員因病去咗睇醫生，新民黨主席葉劉淑儀就自爆患上支氣管炎，民建聯陳克勤亦都因耳水不平衡求醫，醫生仲發現佢患上流感；鄉議局主席劉皇發更加要入院治療，呢股病風真係唔講得笑。
喺星期三大會上，街工梁耀忠本來要提口頭質詢，但佢有病，只可以用沙啞嘅聲線讀「主席，近日不少……」六個字，之後要靠工黨張國柱代佢讀埋落去。而公民黨梁家傑前日去長洲一間學校演講時，唔知佢喺碼頭行返立法會時畀風吹親，定係演講太大聲唔覺意整傷喉嚨，佢到夜晚發現喉痛失聲，仲要盡量減少講嘢免令病情惡化。不過，其中克勤尋日話身體已經完全康復，所以要繼續工作。
依家啲氣溫仲飄忽過唔少政黨嘅立場，真係想唔病都難，但如果保持良好衞生習慣，可以減少感染病菌機會。尤其係班議員長時間困喺立法會，有病最好有啲公德戴番個口罩，否則傳播病菌分分鐘搞到一鑊熟。