政情:大輝議會投票擅作主

中華廠商聯合會立法會代表林大輝上星期公然違背廠商會立場,喺立法會對特首梁振英嘅不信任動議投下贊成票,激起唔少廠商會會董不滿,擔心廠商會被人誤會係「深唐」陣營。廠商會前晚開例會就特別討論大輝喺議會嘅立場問題,聽聞十個會董九個發言都鬧大輝唔跟廠商會立場,仲有人要佢當面道歉添,最後一致通過動議,要求大輝以後投票時要跟隨廠商會立場,絕唔可以任意妄為。 

專設小組促進溝通

自從大輝贊成不信任動議後,班會董已密謀發起聯署信反佢,據聞廿五位聯署嘅會董之中,更有三位係副會長級數,包括李秀恒、徐炳光及吳清煥,佢哋個個都唔忿氣大輝冇跟廠商會立場,自把自為投票。前晚會議中,有會董即場要求大輝道歉,但大輝似乎冇咩意思公開道歉,據聞只係私底下同咗會長施榮懷講聲對唔住。

出席會議嘅幾十名會董,除咗動議要求大輝投票立場要跟足廠商會外,仲通過成立一個新小組,呢個小組專責同大輝溝通立法會事務。我哋問大輝點拆解會董嘅不滿,佢就話有多元化聲音係好事,但唔覺得有太大問題,因為有會董唔滿意,亦有會董鍾意,總之會聆聽各人意見,做應該做嘅事喎。

第一手消息請下載on.cc東方互動iPhone/iPad/Android/Windows Phone Apps