政情：顏寶鈴助選團係先知？
三十六名港區全國人大代表日前誕生，首次參選嘅飛達帽業控股副主席兼董事總經理顏寶鈴（顏太）以近一千一百票當選，顏太嘅助選團喺選舉過後即高舉「衷心多謝大家支持」字眼嘅標語牌感謝選委支持，效率之高認真令人嘖嘖稱奇，難道顏太一早知道自己實會當選？非也，原來一切都係顏太助選團嘅主意，堅持無論贏輸都要多謝選舉團成員投票支持喎。
無論贏輸都多謝支持
據聞顏太助選團呢個做法，雖然事後得到好評，但之前曾有一番爭論，因為有人擔心此舉會否太過高調，甚至畀人感覺「坐定粒六」當選。不過，有份度呢條橋嘅人就認為，無論贏輸都要多謝選委支持，呢個方法簡單直接又有誠意，顏太事後都大讚助選團，話自己雖然無請公關公司幫手，但公司嘅同事真係幫咗佢好多，形容大家一齊工作就好似「一家人」喎。
顏太千辛萬苦當選港區人大，事後有慶祝活動都係人之常情，但顏太話自己未敢慶功，形容依家先係萬里長城嘅第一步，既要將勤補拙「補課」，充實自己各方面知識，亦要多啲同其他港區人大請教，唔知邊個會係顏太首個請教嘅對象呢？