政情：劉江華做官晒火
獲港府委任為政制及內地事務局副局長嘅民建聯前副主席劉江華，尋日佢正式返工，但呢位曾被稱為立法會「重炮手」嘅新任副局長，似乎收晒火，不論記者點問，佢都重複咁話會努力、虛心學習，亦唔會低估困難。雖然劉江華表現得咁謙虛，但尋日仍受到多方狙擊，更有政黨衝去佢結束咗嘅沙田區議員辦事處抗議，批評佢當選民好似避孕套咁「用完即棄」，睇嚟佢要坐穩副局長個位唔易。
劉江華尋日朝喺政治助理陳岳鵬及局方新聞秘書陪同下，坐住政府車準時抵達政府總部返工，但唔知佢係咪感冒未清，眼紅紅、聲線又有啲沙啞。劉江華話，今次係第一次參與政府工作，以後會努力向前輩請教，向其他公務員同事學習，保持與各界溝通及聽取意見，絕唔會低估困難喎。被問到有關政改方案嘅工作，佢就話始終係第一日返工，未必適合評論，但會做好本分。
網民吟詩改圖惡搞
當劉江華喺金鐘返緊工，社民連姜靈彰就聯同其餘五名黨友，由大圍港鐵站遊行至劉江華位於隆亨邨前沙田區議員辦事處，沿路高叫口號話：「劉華選舉得個樣」，佢哋仲批評公民力量潘國山之前好有默契咁讓咗個區議會議席畀劉江華，目的就係為參選立法會超級議席鋪路。當姜靈彰等人抵達後，就送咗一盒避孕套畀一位辦事處職員，叫佢轉交劉江華，諷刺劉江華當選民係避孕套，用完即棄喎。
劉江華身在金鐘政府總部工作，點解社民連要遠赴大圍踩場呢？姜靈彰就話，因為佢哋要話畀當區居民知，要譴責劉江華為咗做官背棄選民，利用選民作為政治工具喎！除咗社民連踩場外，尋日社交網站亦廣泛流傳劉江華嘅惡搞改圖，亦有網民吟詩寸佢話：「輸了選舉何須怕，自有肥缺留江華」。但身在北京述職嘅特首梁振英就力撐劉江華係最好嘅人選。
區會空缺料四人爭
至於劉江華辭去嘅沙田區議會田心選區議席空缺，有意落場爭位嘅除咗姜靈彰外，仲有人民力量袁彌明及民主黨丁士元，喺三位泛民主派人士互相搶票下，相信潘國山可坐定粒六重奪議席，所以如果話劉江華「用完即棄」，倒不如話佢夠環保，交畀自己友循環再用喇。