中環出更：創意鍾偉平 自製玉墜鈕
男士西裝款式千篇一律，好靠領呔同袖口鈕點綴，卓妮日前就喺一個晚宴上遇到稻香集團主席鍾偉平，見佢件恤衫上嘅袖口鈕好特別，原來係用綠色圓形玉墜製成，清雅兼富中國特色。鍾偉平話，市面嘅鈕款選擇太少，於是靈機一觸，去買玉墜自製袖口鈕，但佢笑稱：「塊玉係cheap嘢嚟o架咋！」其實創意無分貴賤，佢用平價玉就做出咁好嘅視覺效果，確係成功。
稱市道旺丁不旺財
早前坊間盛傳香港食肆引入問題食油，鍾偉平強調，其集團嘅採購程序好嚴謹，亦都攞咗ISO品質認證，所以熟客都對佢哋好有信心。今年旺嫁娶，酒樓生意理應有升冇跌，但鍾偉平話實際上唔係賺多好多，皆因物價飛漲，樣樣都貴，市民食嘢買嘢都審慎咗好多，消費氣氛並不濃烈，旺丁不旺財。不過，以佢咁有諗頭，設計多啲新菜式吸引顧客，就唔怕生意難做啦。