中環出更：青聯眾人變身迎聖誕

新婚燕爾嘅霍英東家族長孫兼青聯常務副主席霍啟剛，一身西裝襯牛仔褲嘅輕鬆打扮現身同樂，卓妮問佢點解冇扮嘢，佢笑稱咪扮緊自己囉！講起新婚生活，心情靚絕嘅啟剛話，太太郭晶晶仲適應緊香港生活，好彩佢以前經常四出征戰比賽，性格好獨立，相信好快就會習慣。諗起嚟緊過年將第一次派利是，識人無數嘅啟剛笑稱要儲定錢至得，仲講笑話，初一至初十要匿埋唔見人喎！

講番扮嘢派對，當晚好多靚女扮空姐，包括賢慧社主席羅詠詩（Anthea）及林淑怡，Anthea原來諗住襯番扮機師嘅青聯副主席兼觀瀾湖集團主席朱鼎健（Ken），可惜當日阿Ken喺北京機場受大風雪影響，趕唔切返香港。賢慧社副秘書長周沁就着上一身騎師裝束，意氣風發，佢話好嚮往策騎樂趣，尤其係花式馬術，但一直未能如願，所以咪着晒全套裝束滿足吓囉！

愈忙愈瘦嘅李美辰（左一）及老公蔡德昇（右一）都去趁熱鬧，左二為顏明潤及顏明秀（右二）兩姊妹。	正享受甜蜜新婚生活嘅霍啟剛，單刀赴會與青聯手足同樂。（葉華英攝）	楊全盛（左）扮卡通人物，與妖后上身嘅老婆Sophia（右）勁擺chok樣。

「埃及妖后」惹騷動

當晚最令人拍案叫絕嘅裝扮，非副主席楊全盛太太Sophia莫屬，佢戴上埃及妖后經典假髮及頸鏈，維肖維妙，甫到場即引起一陣騷動，眾人爭相同佢勁擺chok樣一齊影相，認真好玩。

卓妮