十年樹木，百年樹人，教育本來係十分莊嚴肅穆嘅神聖事業。之但係可惜吖，萬一教育事業落入庸官劣吏手中，誤人子弟就會變得屢見不鮮。
上屆政府由曾蔭權打骰嘅時候，推出一項叫做「教育產業化」嘅政策。可能因為煲呔曾自己見錢開眼啩，否則都唔會貪腐醜聞纏身啦，廉署查到依家仲查緊，所以呢一項曾氏出品必屬冇品嘅政策，淨係聽個名已經令人聯想到唯利是圖。
尋日喎，立法會動議辯論檢討教育產業化政策。提出動議嘅新民黨主席葉劉淑儀批評，本地學位已經不足，政府發展教育產業化係本末倒置，廉價批地畀外國私校喺香港辦學，部分中標嘅外國大學甚至連世界排名都冇。葉劉又指出，現時每年仍有過萬名合資格考生不能入讀資助學位，政府反而將珍貴土地批畀外國私立學校收取高昂學費，賺盡內地來港就讀學生嘅人民幣，埋沒良心對唔住本港學生。
又難怪葉劉咁火滾嘅，曾蔭權喺金融海嘯之後倉卒將教育列為所謂六大優勢產業之一，令到香港教育只有軀殼而缺乏靈魂，本地創新能力低於日本同新加坡，反映教育官員冇理念又冇承擔。
提到廉價批地呢家嘢，確係唔火滾都難o架。今年六月本報揭發，貪曾當年以極之優惠嘅條款，吸引著名英國貴族學校哈羅來港建校。哈羅獲准以一千元賤價租用市值十四億元嘅屯門海景靚地，更加獲得政府批出二億七千幾萬元免息貸款，作為興建校舍之用。莫非曾蔭權竟然慈禧太后上身，寧贈友邦，不予家奴？
除咗葉劉之外，亦有唔少議員不滿大學一味賺錢。工黨張超雄就話嘞，政府盲目推動教育產業化，令到大學高層將教育視作一盤生意，喪失教育理想。張超雄仲炮轟大學不斷推出自資副學士課程甚至超收學生，目的只為賺錢，因為印證書等於印銀紙，促請當局成立獨立機制監管。
所以話啫，貪曾遺禍，非同小可，一個唯利是圖嘅政策足以誤及下一代，你都咪話唔「痛心特首」。事到如今惟有撥亂反正，停止教育盲目產業化先至有機會重上正軌。簡單咁講，一於去貪曾化，呢個係修正前朝弊端嘅不二法門。搞教育就正正經經搞教育，如果見利忘義向錢看，產業化嘅後果或者係學店林立，咁嘅情況冇人想見到啦！
求學不是求分數，教育不是教印鈔。印證書等於印銀紙呢家嘢，遲早令到本地大學野雞化，揸住張野雞大學頒發嘅證書，或者濫竽充數嘅副學士學位，呢啲唔係身份象徵，反而係貽笑大方嘅話柄。