立法會尋日終於開完二○一二年最後一次大會，之後就會放聖誕同新年假，下月九日星期三復會。不過傳言今日就係世界末日喎，地球都毀滅咗，人類又絕晒種，立法會點樣可以復會呢？立法會主席曾鈺成就喺會議結束前搞爛gag，話由於議會仲有大量事務需要處理，明年必須續會，所以佢唔可以批准今日係世界末日喎。
雖然呢個gag真係好爛，但唔少議員都畀足面相視而笑，互相祝賀「聖誕快樂」，可見大家都唔相信呢個末日傳言。況且若然末日真係降臨地球，一個小小嘅立法會主席又點可以阻止呢？除非曾鈺成當咗自己係救世主喇！
