政情：打波查經練字 鄭汝樺無官一身「忙」
現屆政府成個熱廚房咁，唔少官員都做到好辛苦，捱到瘦嘅瘦、殘嘅殘。而無官一身輕嘅前運輸及房屋局局長鄭汝樺（Eva）就話，其實佢依家嘅生活都「好忙」，仲忙過昔日做官呀﹗不過見佢「忙」到咁容光煥發，相信會令佢唔少前同事羨慕不已。
時間表密麻麻
早排前財經事務及庫務局局長葉澍堃娶新抱，久未露面嘅Eva都有畀面出席，原來二人係波友，跟同一個教練學打乒乓波。當日Eva一身花衫咁神采飛揚到場，斷估退休生活一定樂得悠閒，不過Eva就話，其實佢依家忙過做官，每日嘅時間表排到密密麻麻，朝朝早唔愁無節目，仲要既有動態，又有靜態，「修身養性」應有盡有，真係非常精彩。
Eva話，依家佢每星期都會預留兩日返教會見吓教友一齊查經，另外一日走去學吓書法習字，再加兩日就去做吓運動，學打乒乓波，順便見吓班波友。就係咁打吓波、睇吓聖經、練吓字，一個星期好快又過o架喇。至於係咪有意義過走入去熱廚房，咁就見仁見智喇。