政情：要有獨立思考 劉達強大膽「文盲論」
喺前排嘅深水埗警員開槍擊斃斬人男子嘅案件上，有網民狠批有記者問警察係咪「開槍打良民」，好彩事後深水埗警區助理指揮官（刑事）劉達強挺身為記者澄清，指記者無咁講過，事件才告一段落。不過劉Sir尋日事先張揚話只代表個人身份發言，又好擔心自己嘅言論「今日下晝會上facebook」，之後就畀人無限上綱，亂作廿四。
尋日青協一項調查發現，警察喺青年人眼中雖然是三大權威人物，但青年人對警察嘅尊重同信任度就麻麻，換句話說警察有權但不能服眾，不過尋日劉Sir就話自己不便評論結果，事緣佢對國民教育有佢一套睇法。
劉Sir話，年輕人絕對可以「責備」國家，但唔好因為呢二百年嘅積弱而否認全個中華民族五千年嘅歷史，「喺資訊發達下，只識聽資訊，而唔識得去分析，大膽講，呢個係一個文盲。」
自言「好卑微學習中」
外號「機械獸」嘅劉Sir喺佢退休前六個月零五日仍不忘寄語年輕人要有獨立思考，至於佢之後去向如何，將退休嘅劉Sir就答「我只係一個好卑微學習中嘅警察」，所以「唔講得住」喎。