政情：泛民救生劉健儀
卅六加七個第十二屆全國人大港區代表前日選出，原來除咗傳聞中嘅西環推薦名單，泛民都有一份「必不可選」嘅十六人名單，呢份名單令代表中總嘅立法會議員廖長江以逾千四票當選「票王」、踢走香港註冊中醫學會會長馮玖，以及令自由黨榮譽主席劉健儀（Miriam）得以排包尾入局。
喺人大選舉前，政圈一直流傳，話唔好睇小嗰班約二百個泛民選委嘅力量，雖然佢哋加埋都係成事不足，但絕對敗事有餘。泛民名單共分成三個部分，除咗南區區議員司馬文同教協方景樂係必然之選外，仲特別列出廿五個相對肯同佢哋溝通嘅專業、獨立人士，包括新民黨副主席田北辰、青年企業家發展局創會主席梁劉柔芬等。「票王」廖長江，同埋以一千零四十二票排包尾嘅Miriam亦都榜上有名。
要拖垮西環盤算
泛民嘅祝福名單仲列出最後九個必贏或必輸嘅人，包括前保安局局長李少光、行會成員陳智思、前立法會主席范徐麗泰、執業會計師陳普芬等。投票畀必贏候選人就話可以理解，投畀必輸嘅人原來都係泛民策略之一，目的就係將西環名單最後幾位危危乎嘅候選人逼出局。
泛民無投嘅候選人包括同泛民喺國教風波有牙齒印嘅科技大學副校長黃玉山、左派背景濃厚嘅基本法委員會委員譚惠珠、剛毅集團有限公司董事長王敏剛等。另外，港島各界聯合會理事長蔡毅、工聯會理事長吳秋北等人都唔喺佢哋嘅名單之上，原因就係因為泛民對佢哋認識唔深。呢個名單上，一共有十六人。
唔識馮玖無投佢
有泛民中人透露，公共專業聯盟上周喺港大搞咗場港區人大選舉論壇，雖然得十幾個候選人出席論壇，但正因為Miriam、香港中小企業聯合會創會會長佘繼標等人有出席論壇，所以就將佢哋列入心水名單。而無揀馮玖嘅原因純粹因為佢無去論壇，而唔係由於大家有過節喎！馮玖最後以三十二票之差做唔到正式人大代表，只可以做第一候補，雖然原因可能有好多，但原來居中攪局嘅都有泛民中人。