中環出更：同太太去完南極唐唐陪愛女血拼
正當特首梁振英北上述職，佢嘅前競選對手唐英年就啱啱同太太去完南極歎世界返港，尋日又同囡囡溫馨掃貨。尋日佢現身中環，陪三女嘉慧行街，兩人行到去「HMV」後，唐唐好有耐心咁陪嘉慧揀DVD同唱片，期間唐唐仲畀咗好多意見阿女，似乎對睇碟有一定心得，之後唐唐仲自動波行去櫃位畀錢。
提到今次南極之行，唐唐就話前後玩咗兩個禮拜，去南極有三大好處，第一係風景好靚，直情好似一幅幅圖畫咁靚；第二係空氣清新，索多啲人都開心啲；第三就係企鵝好得意。今次唐唐同太太郭妤淺二人世界拍拖去旅行，第四個好處當然就係夫妻感情又增進一步。難怪唐唐尋日容光煥發，至於今後有乜新搞作，佢話適當時候就會講喎。
