中環出更：梁智鴻愛老婆畀好多「空間」
香港大學校務委員會主席梁智鴻（金刀梁）係出名嘅「愛妻號」，但究竟愛成點呢？尋日佢為婦女事務委員會一場研討會擔任演講嘉賓，身為主持嘅前民政事務局常秘「媽打」李麗娟大爆金刀梁秘密。佢話金刀梁屋企四千呎，入面只有四套西裝同一個用嚟換季用嘅袋，證明金刀梁將啲空間畀晒老婆喎。
講到年紀漸長，如何活出精彩人生，金刀梁認為保持自信心好重要，所以絕對唔反對男士做少少整容，個樣望落精神啲，自尊心都相對提高啲。同場演講嘅前商務及經濟發展局局長馬時亨（Fred）忍唔住問佢：「咁你最近整過啲乜嘢？」金刀梁即笑謂：「呢啲係私隱。」唔通佢真係有整過？
馬時亨靠「失憶」保年輕
身為虔誠基督徒嘅Fred笑言，聖經入面曾經講過，男士係一家之首，但聖經講漏咗「太太係條頸」，冇咗條頸嘅話，個頭想郁都冇得郁！所以佢會將教育兩個囡囡嘅責任交晒畀老婆，佢只負責做司機。Fred又分享保持年輕嘅秘訣，就係要學會「失憶」，忘記自己嘅歲數「冧巴」、忘記戶口有幾多錢，就係咁整容醫生都唔使搵喇。
南韓選出首位女總統，Fred對此深有感觸，佢憶述三十幾年前喺南韓搭地鐵，竟然有女人讓座畀男人，依家轉變認真大。佢仲話，唔排除香港未來出個女特首。媽打即時追問Fred幾時會有，佢就答話，依家已經有個「署理女特首」啦！前立法會秘書長吳文華（Pauline）都嚟捧場，佢話以前在職時試過因為女性身份，工作能力不獲認同，解決閒言嘅方法，就係更加勤力，做嘢要抵得諗，唔好爭住領功，大家就會慢慢認同佢。
卓妮