空穴來風，未必無因，食油供應商溝來溝去溝出「混合油」，到底有冇問題o架？就算即時中毒食死人嘅機會比較低，會唔會慢性中毒食到癡癡呆呆坐埋一枱？
坊間近日除咗盛傳冬至來臨就係世界末日之外，亦都盛傳一張長過水蛇春嘅食肆名單，不少大型連鎖食店嘅大寶號都位列其中，雖然好多人質疑名單嘅可信性，不過羊群心態之下照樣轉載，擔心呢一批食肆用嘅係有問題嘅混合油。
真相究竟係點嘅呢？搞到中華大地聞風喪膽嘅坑渠油會唔會殺入香港o架？理論上應該為香港人嘅腸胃嚴格把關嘅食環署終於出動嘞，針對傳媒報道懷疑無牌經營嘅食品加工場涉嫌出售質素有問題嘅食用油，食環署去到相關工場、糧油供應商以及十二間食肆巡查，抽取總共三十九個樣本測試是否含有致癌物質苯並〔a〕芘（Benzo〔a〕pyrene）。食物安全中心公布嘅化驗報告顯示，三十九個樣本之中有兩個樣本嘅苯並〔a〕芘含量分別係每公斤十六同十七微克，超出國家標準每公斤十微克，更超出歐盟標準每公斤兩微克好多倍。另外，有兩個樣本嘅苯並〔a〕芘含量低於國家標準但超出歐盟標準，分別係五點八及六點二微克。
食物安全中心就話嘞，現行法例並冇就食物含有苯並〔a〕芘制訂法定限值，雖然化驗樣本之中嘅含量對公眾健康構成嘅風險應該不大，不過為慎重起見，已經要求供應商停止供應有關產品，並向客戶全面回收。巡查還發現位於葵涌嘅油行衞生環境欠佳，食環署會發出通知要求改善衞生情況。
亦即係話，唔理食油到底係咪來自坑渠，部分含有致癌物質係事實。咁功夫茶就想問一問食環署嘞，點解現行法例冇法定限值嘅呢？因乜事幹唔設立相應嘅監管機制？既然國家又有標準，歐盟又有標準，即係香港都應該有標準啦，冇理由放任食油供應商不管啫，吓話？仲有喎，食環署餐餐都要等到傳媒報道先至巡查懷疑有問題嘅柴米油鹽醬醋茶，後知後覺甚至不知不覺好容易出事o架，萬一真係坑渠油攻陷城池，唔單止平民百姓有機會中招，達官貴人同樣有可能食到腸穿肚爛o架。你知啦，香港嘅醫療事故頻率之高簡直嚇破膽，假如一個唔覺意有問責高官誤吞問題食油，送院急救居然打錯針又食錯藥，邊個負責呀？食衞局局長高永文睇怕都孭唔起啦！
總而言之，問題食油忌誤吞，監管更忌慢吞吞。食環署為己為人為社稷，把關要嚴，出手要狠，徹底趕絕坑渠老鼠一樣咁討厭嘅奸商！