鄉局例會都冇現身
鄉議局尋日開例會，大家都好緊張發叔究竟會唔會出現，點知發叔真係病咗冇現身。發叔個仔、執委之一嘅劉業強就透露，發叔已經出咗院喺屋企休養，但老人家有感冒好難斷尾，加上呢兩日天氣時冷時熱，所以發叔最後都係乖乖哋留喺屋企休息喎。
席上嘅執委提起部分村民上月衝擊鄉議局，都好慶咁不吐不快，其中沙田鄉事委員會主席莫錦貴更指有人「別有用心」分化村民，力撐發叔呢幾年同政府就村屋僭建嘅談判「講到牙血都出埋」，絕對唔係冇幫村民爭取。
代發叔主持會議嘅副主席張學明就大派定心丸話，如果參加咗村屋僭建申報制度，就起碼五年內唔使拆，但五年後拆唔拆，相信就冇人保證到喇。