政情：Greg蘇做布景板 嫻姐講唔停口
工聯會立法會議員陳婉嫻多年來埋首爭取將啟德明渠發展成啟德河，仲想將多位演員住過嘅鑽石山大磡村變成為具電影同保育嘅主題創意園，呢兩項大計已幾近成為嫻姐嘅志願。啟德河搞掂咗，嫻姐重返議會後就繼續窮追港府發展大磡村，尋日仲拉埋商務及經濟發展局局長蘇錦樑（Greg蘇）到大磡村視察，嫻姐幾乎將過去幾年冇做議員期間想講嘅說話，一次過爆晒出嚟，Greg蘇就做布景板戙喺度聆聽。
承認年長會友詐型
嫻姐約齊人落區搞場大龍鳳，Greg蘇都唔敢空手到場，預告即將會就大磡村發展計劃到黃大仙區議會諮詢喎。嫻姐之後仲同傳媒茶敍，講起工聯會喺長者生活津貼計劃（長津）撥款一役飽受抨擊，嫻姐承認確有唔少年長會友猛烈批評佢嘅表現，但嫻姐自稱係「死硬派」，覺得要做嘅事就會千方百計咁向政府爭取，其中爭取立法標準工時亦唔例外，佢仲話會爭取政府喺今個立法年度完成所有諮詢，等下屆立法會可完成立法。