政情：教院未正名 炳良嘆冇符
香港教育學院前校長張炳良加入新政府管治班子出任運輸及房屋局局長，唔少教院師生都認為對教院「正名」為大學有正面作用，張炳良本人亦講過教院正名「指日可待」。不過，有知情人士估計，教院正名隨時要等多兩至三年先至成事，除咗因為政府掛喺口邊嘅「程序公義」外，另一主因係仲有好多專上院校排緊隊想升格為大學，教育局局長吳克儉必須揸緊嚟做，令教院正名有排拖。
教院早於○七年首度申請正名，但失敗而回，張炳良○八年接任校長後，矢言將帶領教院正名列作其首要任務，外界亦估計張炳良當時身兼行政會議成員，或多或少可以加速整個正名程序。不過事隔四年，教院仍未獲批准升格做大學，但張炳良就於今年中辭任校長，轉投「熱廚房」出任問責局長，令正名一事再添變數。可惜嘅係，佢臨走前仲大開期票，話正名一事係「指日可待」，期望不久將來可回校與師生慶祝成功正名。
事實上，唔少教院師生對張炳良嗰句「指日可待」充滿期盼，同時認為，雖然佢並非出任教育局局長，但身為新政府管治團隊一員，加上佢對教育政策嘅熟悉程度遠勝吳克儉，總會對正名一事帶來幫助。
不過，有知情人士指出，教院正名係一件大事，一定要依足相關程序審批處理，包括確保該校嘅課程、設施，尤其係師資符合大學水平等，絕不可草率行事。
託孤吳克儉 繼續等待
知情人士又話，本港仲有好多專上院校排緊隊希望升格為大學，包括同教院一樣有番咁上下歷史嘅珠海書院、以及近年新成立但出過好多傑出學生嘅恒生管理學院等，如果政府對教院正名稍為鬆手，立下先例，其他院校就可以大大聲咁話：「教院都得，點解我唔得？」事實上，香港現時有多達八間大學，有人已質疑過多，仲要求政府審批時揸番緊啲。依家教院正名處境，就好似被張炳良當係孤兒咁託孤畀吳克儉，睇怕教院一班學生都要繼續耐心再等待吓喇！