政情：「蛋中鑽」求婚 男士攞滿分
男士向愛侶求婚，總要花啲心思。資深珠寶設計師商若賢（Pinky）以一隻平平無奇嘅「蛋」為主題，巧手設計出求婚法寶，一打開蛋形吊墜外殼，竟然內藏一顆晶瑩美鑽，收禮者肯定驚喜萬分。Pinky話，呢隻「蛋」除咗可以用作求婚之外，仲可以送畀初生嬰兒，寓意生生不息咁話。
商若賢嚴選靚寶石
「蛋中鑽」嘅設計特色，係可以將原隻蛋嘅物料溶咗佢，再鑄造成結婚戒指，別具意義。身兼英國皇家寶石協會會員嘅Pinky，擅於寶石設計，更與國際知名首飾品牌嘅供應商合作，引入全天然嘅珍貴寶石。佢話一粒寶石對產品嘅整體質素影響好大，所以佢唔靚嘅寶石一定唔會要。
單睇Pinky現在好似一帆風順，但原來佢嘅創業路並不平坦。Pinky已故嘅父親都係做珠寶生意，但當時年少嘅Pinky性格反叛，唔肯繼承父業，畢業後寧願四出叩門，幫人打工。
兜兜轉轉，Pinky發覺自己最感興趣嘅都係珠寶設計，最終自立品牌，延續爸爸對珠寶嘅一份濃情。