政情：中環出更：高佬賢教路 雞泡膠治經痛
今時今日立法會開會郁親就拉布，議員焗住捱更抵夜。一班立法會議員尋日就去咗工展會掃貨輕鬆吓，包括蔣麗芸（Ann）、葛珮帆（EQ）等議員狂掃罐裝鮑魚、西班牙火腿、冬菇及麥皮等食物，最誇張係連湯煲都大手買入十幾個，仲落柯打直接送貨到立法會添。不過，最特別嘅都係漁農界何俊賢（高佬賢），佢向一眾婦女推介食雞泡膠，話可以治療經痛困擾喎！
楊孫西按摩變超人
話說年紀輕輕嘅高佬賢行過海味攤檔時，好誠意咁推介本港漁民生產嘅花膠，仲話城中姊妹們若有經痛困擾，可以食雞泡膠醫治。吓？點解佢識呢啲嘢o架？高佬賢就面不改容話，佢係漁農界代表，當然識啦！據講雞泡膠係河豚鰾，係婦女調經妙品，對氣管虛弱、鼻敏感、肺弱、白內障好有療效。不過，雞泡膠不及花膠爽口，但食療功效好高。
卓妮喺工展會場仲見到福建幫頭領、全國政協常委楊孫西，佢買咗好多罐裝鮑魚及西班牙火腿，仲教路話西班牙火腿同茅台味道好夾。後來佢去到德國寶嘅攤位時，好奇試戴頭部按摩器，雙眼被深色眼罩遮住，十足超人咁款。唔知阿Ann係咪喺立法會畀拉布嚇怕，見到部按摩器時又諗起拉布，佢話迎戰拉布時戴住嚟開會，就唔使怕被人發現瞌眼瞓喎。
卓妮