富者愈富，貧者愈貧，雖然係老生常談，但係一啲都冇講錯。貧富懸殊除咗反映於金錢方面，其實居住環境都係一樣o架咋。有錢買得起豪宅住大屋嘅達官貴人瘋狂僭建，屋企愈住竟然空間愈多，上有空中花園下有奢華密室，相反窮等人家就慘情咯，居住空間變得愈來愈豆腐膶，細到好似狗竇一樣。
窮人住嘅地方有好多種叫法，既可以係板間房，又可以係棺材房，為咗方便起見一般統稱劏房。到底家陣港九新界總共有幾多間劏房呢？有幾多個貧苦大眾必須蝸居於轉個身都有困難嘅擠迫戶？民間組織「全港關注劏房平台」做過一項調查，中西區、觀塘、九龍城以及深水埗等等六個地區，樓齡三十年以上嘅私人大廈合共超過四千個單位，其中百分之四十二改建為劏房，平均每個單位被劏成四點三間房。呢一個組織根據民政事務總署資料推算，全港有一萬六千座同類型私人大廈，劏房至少六萬七千個，大約二十八萬戶家庭入住。
大家唔好唔記得，劏房嘅「呎租」隨時貴過半山區，即係話劏房嘅業主收租收到眉開眼笑。既然係咁，劏房嘅業主又可以買得起豪宅住大屋，繼而以權貴為師瘋狂僭建，享受無法無天嘅居住樂趣。所以話啫，富者愈富，貧者愈貧，「笨」唔係呃鬼你o架！
除此之外，社福機構基督教服務處天倫綜合家庭服務中心做過另一項調查，發現接近半數劏房家庭廚廁共用，衞生情況令人擔心。七成半受訪劏房家庭指出，環境狹窄引致家庭衝突。
唉，講來講去都係香港嘅房屋政策太失敗，搞到安居樂業變成遙不可及嘅春秋大夢。如果你係阮囊羞澀嘅赤貧一族都叫做好少少，起碼有機會入住公屋。最慘係嗰啲一心諗住自食其力嘅有骨氣一族，收入多到冇資格申請公屋，不過又少到冇能力租用正正常常嘅住宅單位，更加唔使講買樓啦，所以就要唔理好醜屈就於廚廁共用嘅蚊型劏房。
所謂房屋政策太失敗，一來係地貴樓貴租金貴，二來係公營住宅供不應求，想話輪候公屋上樓咩，鬥長命啦老友！
梁振英由未做特首到做咗特首咁耐，開口埋口都話解決市民居住問題係重中之重，事實上交出乜嘢成績呢？唔好意思，功夫茶真係睇唔到囉。
嗱，唔好話嚇你，房策失敗必然惹來仇富心態。權貴階級試下繼續僭建吖，貧無立錐之地嘅窮人遲早忍無可忍，無產階級革你老命由共產黨示範過一次o架啦，一個唔覺意可能會有第二次。