香港核心價值之一的廉潔奉公已毀在貪曾手上。廉署貪污問題諮詢委員會主席史美倫稱，本港今年清廉指數排名下跌至第十四位，或與年內有多宗涉及政府高官及商界的貪污案有關。依老朽觀察，與廉記做嘢「歎慢板」先至有莫大關係，有乜理由貪曾下台咁耐，對佢依然「立案」調查，至今連屁都未放一個，睇嚟又想靜雞雞不了了之！咁搞法，香港嘅清廉指數排名睇怕不會回升，只會是「飛機上掛糞桶——臭名遠揚」！
貪曾禍港七年，身為特首，其icon竟然係煲呔上繡咗個貪字，冇人記得佢為港人做過乜，只知佢最叻做離岸特首，貪盡海陸空，歎盡省港澳，下台後依然逍遙！
貪曾視廉潔如無物，完全當廉署冇到，鬼咩，罪不上大夫，加上當時嘅廉政專員湯顯明同佢關係密切，貪曾貴為行政長官，有關貪污條例佢唔上身，難怪佢貪得如此理直氣壯，毫無敬畏之心！古人說：「君子有三畏：畏天命，畏大人，畏聖人之言。」貪曾就是不信邪，是以在位期間，喜怒形於色，一副唯我獨尊無所畏懼的架勢。
「敬畏之心」是一把手的必備素養，沒有這樣的素養，幹甚麼都無所顧忌，「和尚打傘，無法無天」，就難免出現歷史悲劇。要有「敬畏之心」，單靠「自律」是不夠的，還必須有制度的「他律」，「他律」就是任何人，包括一把手都必須遵守的制度。香港號稱法治之區，貪曾的貪又豈能任其「貪了埋藏了就等於冇貪」？葵花雞、增城菜心吃落肚化為米田共變為春泥更護花，就等於沒有貪，尋且做了善事？