機艙服務員一向予人文靜同工作嚴謹嘅感覺，不過最近某個視頻網站上載嘅一段短片，就顯出佢哋活潑開朗嘅一面。喺呢段長達五分鐘嘅短片中，見到逾百位穿着整齊制服、拖住旅行篋嘅國泰航空「空姐」同「空少」喺國泰城出現，佢哋突然走進人群中大跳熱舞，途人可能感到意外，都睇到目瞪口呆，場面認真搞笑。
國泰企業傳訊總經理梁皚亭尋日就為呢段短片解畫，佢話呢次其實係一個愛心籌款活動，當日公司嘅一百一十五個空中服務員及機艙服務部同事，自發性咁喺公司總部組成「跳舞快閃黨」，跳完舞之後，義工隊就向圍觀嘅同事收集捐款，募捐活動仲會持續一星期，幫助本地各類有需要嘅人士。呢條籌款嘅計仔都幾創新喎，唔知其他慈善團體會唔會都試吓整番隊「乜乜快閃黨」嚟催谷善款呢？