人民力量立法會議員陳志全（慢必）喺當選後「出櫃」，公開承認自己係同性戀者，轟動本港政界以至整個社會。公務員出身嘅新民黨主席葉劉淑儀，日前亦透露公務員隊伍內亦有唔少同志，多年來獲政府保密身份。據聞代號「方方」嘅高官，就係其中一位公認嘅同志公僕，佢仲為咗保護個人私隱而放棄「升呢」添。
「方方」薪高糧準，做嘢醒目，個樣亦唔差，但佢遲遲未婚，甚至連同異性朋友拖吓手仔都未傳過，早已被同僚議論紛紛。其後更有人喺外國撞正佢與一名外籍同性伴侶親密行街，輾轉經其他高級公務員傳番去「方方」耳中，佢都只係一笑置之，無承認亦無否認，自此大家都公認佢係同志一族，同時好尊重佢嘅個人私隱同生活。
年前有港府高層睇中「方方」嘅辦事能力，力邀佢更上一層樓，但此舉可能會令佢隱藏多年嘅性取向曝光，最後「方方」都係唔肯「出櫃」。
其實除咗慢必之外，有傳仲有一位已婚嘅現任立法會議員，其實都係同性戀或雙性戀者，但由於冇證冇據，而佢嘅「表面伴侶」亦未有出過聲，大家先唔敢公開地講有關於佢嘅是非。