「狂賀！民主最光明一天！」民主黨（白鴿黨）尋日改選領導層，聲言裸退又臨時着返衫參選嘅劉慧卿，以低票擊敗諗住坐定粒六當選嘅單仲偕（先刂雞），成為該黨首名女主席。投票結果一公布，網民都Ｏ晒嘴，揶揄唔選又選嘅卿姐當選係「貫徹民主黨精神，出爾反爾」，更建議白鴿黨「改名叫前綫啦！」
白鴿黨今年喺立法會選舉遭重挫後，當時嘅領導層承諾加快換血速度，革新白鴿黨，卿姐與時任主席何俊仁更宣布裸退，正當（先刂）雞疊埋心水做主席之際，化石級嘅卿姐又走出嚟參選「促進競爭」，最後仲贏咗添！
成班等住上位嘅乳鴿可能都睇唔通發生咗乜嘢事，個黨就已經揭到下一頁，唔怪得有網民話「留名睇人退黨」，相信今次選舉結果又會引發一場退黨潮。除咗領導層，三十個當選嘅中委入面，三分之二係四十歲以上嘅老鴿，平均年紀成四十四歲，仲話望以清新形象吸引新黨員喎。
今屆副主席由上年先加入白鴿黨嘅蔡耀昌，同埋負責創意文宣嘅羅建熙接棒，立法會議員胡志偉就以十幾票之差落選，但就以高票當選中委，成為中委票王，何俊仁同單仲偕緊隨其後。