政情：陸恭蕙兩分鐘沖完涼
環境局局長黃錦星（KS）自上任後為樹立環保形象，於是特別強調自己如何節能，例如要求屋企人盡量減少用電，真係今時今日為官甚艱難。唔知係咪睇到老闆親力親為推動環保唔敢鬆懈，定係想有意無意話畀人知其實自己都好環保，副局長陸恭蕙（Christine）尋日出席地球之友一個步行籌款活動時亦都自我揭秘，話近來喺屋企同家人鬥慳水，仲話自己可以喺兩分鐘內沖完涼添。
前天文台長林超英（黑英）前排喺電台節目中引述KS威水史，話KS全家喺高峰期可以每人每日用一度電，比黑英嘅兩度電仲要低成倍。黑英當時話自己輸得心服口服，之後仲爆出一句：「連我都打低埋，梗係有理由做局長！」兩人鬥慳電，Christine就另闢蹊徑講慳水。佢尋日賣口乖話試過喺屋企舉行「鬥快沖涼比賽」，各家庭成員會互相記低沖涼時間，睇吓邊個係「慳水王」。Christine透露自己可以喺兩分鐘內沖完涼，但有個男性家庭成員竟然可以喺一分二十秒內沖完涼，令佢覺得非常不可思議喎。