政情：佘繼標證有推薦名單
第十二屆港區人大選舉後日投票，照例又傳出話有推薦名單，不過尋日過後，似乎呢個已再唔係傳聞，因為尋日竟然喺一個選舉論壇上面，殺出人證，證實的確係有呢份名單o架。
話說公共專業聯盟尋日喺香港大學借咗地方搞港區人大選舉論壇，雖然出席嘅選委只有小貓三、四隻，但在場嘅十多位候選人都好盡力爭取支持。當中最出位嗰個莫過於香港中小企業聯合會創會會長佘繼標喇！佢喺自我介紹嘅時間，講講吓要增加青年人向上流動的機會，突然話「有事鍾無艷」，自爆有人同佢講過，話佢唔喺份四十人名單入面，所以當選無望，亦正因為咁，好多人都唔騷佢，包括左派嘅喉舌機構。
佘繼標會後喺記者再三追問下就話，自己只係想做第三十七個當選人大嘅候選人，等有人移民或者其他原因退出時，有機會任港區人大。不過喺幾日前，有幾個朋友及西環嘅官員同佢講，話佢唔喺份名單上面，所以佢好唔開心。佢仲話：「我哋都係熱血嘅人嚟o架嘛，為港為國奔波咗咁多年，點解我無份？」
佘繼標出奇制勝，唔知能否殺出一條血路？