政情：鬍鬚曾恨做星官？
繼瓦努阿圖後，新加坡呢排好似成為咗另一個「我最想住嘅地方」。其實要成功吸引一眾港人趨之若鶩，一啲都唔難，只要福利好、易買樓咁就得o架喇！不過講到最成功嘅新加坡推廣大使，真係不得不提特首梁振英（CY），因為佢經常警惕香港人，新加坡經濟發展已超越香港，提醒如果港人再唔迎難而上就唔得掂，令好多原本唔留意新加坡嘅人都忍唔住望多新加坡兩眼。就連財政司司長曾俊華（鬍鬚曾）都好似心郁郁想過檔去獅城做官，貪彼邦傳媒會「一面倒鋪天蓋地」報喜！
鬍鬚曾尋日喺網誌話，近年好多人都鍾意拎香港同新加坡比較，而佢亦留意到兩個地方一個好有趣嘅分別，就係傳媒處理新聞大不同。鬍鬚曾話，如果喺新加坡有好消息傳出，新加坡嘅媒體就幾乎會「一面倒鋪天蓋地」咁「報喜」，相反香港傳媒喺呢方面就較冷淡。
港青贏拳王少報道
事關上星期年僅廿五歲嘅曹星如，技術擊倒對手，贏咗「亞洲洲際金腰帶」，成為香港首個全職「拳王」。而曾經習武洪拳，身為黃飛鴻唔知第幾代第子嘅鬍鬚曾當然好留意。鬍鬚曾睇直播見證曹星如摘金，點知第二日打開報紙，各報章只係得寥寥一、二百字報道，鬍鬚曾於是無限失落。
稱陰謀論有市場
鬍鬚曾喺網誌感嘆話，近年有個講法，話陰謀論喺香港都頗有市場，而「末日論」之所以喺香港炒得咁熱烘烘，某程度亦反映社會上一種「恐懼心態」，反映香港人自信心不足。鬍鬚曾又話，新加坡傳媒每遇「好消息」都鍾意「一面倒鋪天蓋地」咁「報喜」，而香港傳媒對「好消息」就比較冷淡﹔相反有壞消息出現，兩地傳媒報道嘅態度又會掉轉。於是鬍鬚曾又嘆氣咁話，其實香港人過去百年成就都係港人所創，鼓勵港人勿妄自菲薄，仲霸氣一句：「香港人，怕甚麼？」
其實，「鬍鬚曾，你怕甚麼？」如果你唔計錯數，如果你唔做守財奴，如果你可以喺水浸嘅庫房滴出少少嚟紓解民困；如果你無「壞消息」畀香港人，相信香港傳媒都唔使「一面倒鋪天蓋地」咁「報憂」。但如果鬍鬚曾計錯數都要傳媒「一面倒鋪天蓋地」地報喜，或者鬍鬚曾要去新加坡做官喇！