中環出更：葉澍堃娶新抱 官商老友到賀

一對新人Hiram同Connie一齊親手織咗冷頸巾送畀雙方父母，多謝佢哋多年來養育之恩，兩人咁孝順，父母戴在頸上，條頸巾一定溫暖過溫暖牌。新郎哥話兩夫婦未去過南美，所以會到阿根廷、危地馬拉度蜜月三星期，去完之後就五大洲都去過晒嘞，至於會否盡快生小朋友，兩口子話順其自然。

新老爺Stephen話要讚一對新人，佢笑言因為安排婚禮同搞演唱會冇乜分別，好多細節要安排，好彩自己只係負責試菜。但呢幾星期畀唔少老友怪責，因場地所限，僅可以邀請十分一老友，只能寄望細仔瀚華捱吓義氣快啲成家立室請番佢哋補番數喎。佢更多謝一對新人令佢「事業」去到高峰，此「事業」並非佢重投職場，而係佢咁多年打麻雀紀錄係贏六底，娶新抱前一晚同幾個老友竹戰，居然贏咗十四底，創咗佢麻雀「事業」嘅高峰！而幾位「受害」老友當然亦係座上客啦。

葉澍堃（左四）與一眾前同僚陳家強（左起）、李少光、鄭汝樺、及（右起）譚智源、馬時亨、梁錦松趁機聚首。

財經事務及庫務局常秘區璟智（右）同其銀行家老公冼銳民到賀。（葉華英攝）

仙姐現身　賓客爭合照

嘉賓席上，星中之星係殿堂級粵劇名伶白雪仙，好多嘉賓變成小影迷爭相同偶像合照。晚宴期間先後有Stephen好友、前立法會秘書長馮載祥、立法會議員石禮謙即場獻唱，壓軸就由新老爺高歌一曲英文歌「If」，真人不露相，博得全場如雷貫耳掌聲。

行政、立法雙料議員林健鋒喺政壇有新動作，一眾老友唔知有無合作機會呢？

殿堂級名伶白雪仙（前排中）係宴會嘅焦點之一，政經名人都成為咗佢嘅小粉絲，前立法會議員劉千石（前左）一如以往幫手做仙姐嘅「石Q」。

左起國泰董事及常務總裁朱國樑、全國政協常委陳永棋、前高官馬時亨，右一、三、四分別係藝術發展局主席王英偉、全國政協常委余國春同新老爺葉澍堃。

卓妮