一年一度嘅工展會開鑼喇，大家有冇諗住去掃平貨呢？你知啦，通脹高企，百物騰貴，工展會變咗特賣會，慳得一蚊就一蚊，去工展會掃貨，已經成為唔少市民一年一度嘅指定動作。
嗱，工展會有三多，人多、攤位多、貨品多，今年盛況依然，人頭湧湧，不知幾熱鬧。其實，除咗呢「三多」，工展會仲有一多，就係內地同胞多，唔少個人遊旅客亦加入掃貨行列，大篋小篋，大包小包，都咪話唔誇張。唔怪得有人話，工展會已經淪為散貨場。
所以話啫，今時唔同往日咯，工展會好多貨品已經唔係香港產品，連銷售對象亦唔再只係香港人。當然，無論時代點變，工展會有一樣嘢年年不變，就係永遠人山人海，旺過趁墟。無他嘅，賤物鬥窮人吖嘛，正如有人話齋，工展會係經濟寒暑表，今年盛況更勝舊年，睇嚟明年大家都要自求多福咯。
講起都令人唏噓，工展會可以話係香港經濟發展嘅縮影，工展依舊，面目全非，正正就係本港工業式微嘅寫照。想當年，香港工業發展蓬勃，電子、製衣、塑膠等行業幾乎執世界牛耳，到咗依家，試問仲有幾多產品係「香港製造」嘅呢？
最令人慨嘆嘅係，回歸十五年，工展會都復辦咗十幾屆啦，點解香港仲未搵到經濟新出路？工展會嘅貨品都唔同晒啦，點解港府高官仲係十年一日不思進取？乜嘢科技港、中藥港、紐倫港，全部都係大隻講。前朝曾蔭權爵士仲衰，禍港七年，一味傍住富豪黐飲黐食，對經濟及民生問題闊佬懶理，關人個關，六大產業無晒下文，十大基建嚴重超支，咁搞法，香港何年何月先至可以浴火重生呢？
唐詩云：「去年今日此門中，人面桃花相映紅；人面不知何處去，桃花依舊笑春風。」工展會滄海桑田，香港經濟盛況不再，功夫茶真係想改幾隻字：「往年今日此門中，工業商業相映紅；人面不知何處去，工展依舊笑春風。」
經濟發展同工展會一樣，都要與時並進，推陳出新，香港再蹉跎歲月，高官再胡混度日，香港話唔定真係有朝一日返番去穿膠花年代，到時炒晒班膠官都無用！
人面桃花，不堪回首。工展會作為香港幾代人嘅集體回憶，保留落嚟嘅最大意義，可能唔止畀市民掃平貨，抗通脹，而係提醒港府，鞭策高官，與時並進，奮發圖強，發展經濟，改善民生，唔好搞到本港經濟好似王小二過年，一年不如一年呀！