自從離開立法會呢個政治舞台，民主黨李華明（肥仔明）就走去開公關公司搵真銀。肥仔明透露，公司開張大吉至今只有個半月，但已經接咗幾個計劃，總算搵到兩餐。雖然自己生意要成日睇住，但肥仔明話幾忙都要放吓假，喺「世界末日」當日會同老婆搭飛機去美國洛杉磯探望定居當地嘅細佬，而喺日本工作嘅囡囡都會飛過去同佢哋一齊過聖誕。
肥仔明囡囡一向醉心日本文化，大學畢業後去咗日本參加為期一年嘅「工作假期計劃」，之後經親友介紹去咗京都一間五星級酒店打工，由bell girl做起，專門幫人拎行李，之後轉做酒店文職，負責處理內部員工事務。肥仔明話，初時聽到囡囡要做bell girl都覺得好心痛，但囡囡就反而安慰番佢，話通常都係外國人入住酒店，每當見到弱質纖纖嘅bell girl拎行李時，就會即刻耍手擰頭，寧願自己攞番啲行李好過喎。
雖然酒店經理覺得肥仔明囡囡工作表現唔錯，仲諗住幫佢申請工作簽證長期留喺日本，但囡囡就覺得日本大部分企業高層職位仲係由男性把持，寧願返香港發展。愛女回流，最開心嘅莫過於肥仔明喇！