政情：掛「議員職員」證 葉劉女兒惹質疑
按照立法會規定，議員唔可以聘任親屬，原意係避免公帑被議員私相授受，衍生利益衝突等問題。不過，新民黨立法會議員葉劉淑儀尋日就喺社交網站專頁上自爆，有人懷疑佢亂用立法會資源，亦即公帑聘用其女兒葉榮欣（Cynthia）做助理，葉太聲言只係謠言，仲話件事只係「得啖笑」喎。
葉太留言話，由於Cynthia經常戴住立法會議員職員證出入立法會大樓，因而令人誤會佢用公帑聘請女兒做助理，懷疑有利益衝突。葉太強調，Cynthia只係新民黨職員，由新民黨支薪，加上該黨好多職員都持有立法會「議員職員」證，以方便出入立法會工作，應該話係用新民黨資源「補貼」立法會至真。
陳維安：研方法防誤會
為咗釋除大家疑慮，葉太就諗出兩個解決方法，包括叫Cynthia少啲去立法會，其次係建議立法會秘書長陳維安設計多一種證件，叫「議員義工」證，咁佢啲義工就可以名正言順咁入立法會喎。陳維安一見到葉太提及佢個名，就拿拿臨回覆話，已收到葉太嘅意見，會研究點防止呢啲誤會。