政情：劉江華又帶挈克勤升呢
作為「萬人黨」民建聯（民記）明年四月舉行換屆選舉，民建聯副主席劉江華加入政府出任政制及內地事務局副局長在望，如無意外會喺適當時間辭去黨副主席職務，據聞佢個副主席空缺好大機會交波畀黨友立法會議員陳克勤（克勤仔）。有人笑言克勤仔多年來屢次獲劉江華帶挈，莫非劉江華前世欠咗克勤仔？
本報早前率先報道，民建聯副主席劉江華極有可能加入政府，劉江華尋日首度開腔回應，並無否認呢個傳聞，只係話不評論事件，當問及做副局長係咪「屈就」時，更表明心迹話喺不同崗位都係為市民做事喎，睇怕佢呢番間接表白，加入政府嘅機會都唔細，但該黨嘅連鎖反應隨之將會發生，甚至連繫住「升呢」做黨領導層嘅階梯。
有消息指，民記會喺明年四月換屆，劉江華料屆時已加入政府，由於佢出身新界，如無意外副主席一職需由來自新界者填補，有傳黨內開始醞釀三個「升呢」人選，分別係克勤仔、新界東「票后」葛珮帆及新界西扎根多時嘅陳恒鑌，當中又以黨內資歷較深嘅克勤仔獲看高一線。
提攜入立會選舉名單
事實上，克勤仔多次「升呢」都同劉江華有關，佢九九年廿三歲就成為沙田區議員，之後○三年因「七一效應」連任失敗，但喺○四年已獲劉江華提攜喺立法會選舉名單排隊，之後更獲黨舉薦加入政府出任特首辦特別助理。克勤仔離開政府後又旋即同劉江華拍住上，於○八年立法會新界東選舉名單雙雙當選，直到剛過去嘅立法會選舉先至分道揚鑣。
對於「升呢」黨領導層傳聞，克勤仔接受查詢時話，多謝有人對佢嘅支持，強調會做好本分，又話無論邊個做都好，最緊要為黨大局出發喎。究竟克勤仔會否時來運到「升呢」，睇怕仲有一番龍爭虎鬥，明年四月自有分曉。不過，民記剛通過修改黨章，副主席數目由四個增至五個，會否多咗位反而有利克勤仔，咁就不得而知喇。