中環出更：官商逛工展 梁太愛「呷醋」
今年嘅工展會尋日又開鑼，特首梁振英（CY）同太太唐青儀孖住去維園出席開幕禮。雖然CY兩公婆只係行咗幾個社企攤檔，但梁太都睇中唔少心頭好。不過，卓妮就發現原來梁太鍾意「呷醋」，佢喺有機食品店試飲咗一杯「美人桑椹醋」後，就一口氣掃咗兩盒，仲掃多盒「青澀梅果醋」添。桑椹主治暈眩耳鳴、心悸失眠，唔知梁太買畀自己定買畀老公CY呢？
梁太買醋外，又睇中一個由南亞裔婦女手製嘅手提包，盛惠二百五十元，CY即刻識做「磅水」。唔知係咪因為CY一向鍾意耕種，佢哋對花特別有興趣，無論係真花盆栽定係手作假花都有買，連埋一啲小擺設，總之行咗唔夠半個鐘就使咗成一千二百元，幫助社企之餘，亦滿載而歸。
除咗CY兩公婆識保健外，教育局局長吳克儉都好識補，佢話返工成日要講好多嘢，所以鍾意食佛手果潤喉。佢話曾經喺台灣見過五年嘅佛手果要過萬元一隻，雖然工展會入面賣百多元一隻貨式唔可以同台灣嘅相比，但佢都買住兩隻頂住先喎。佛手果有理氣化痰、舒肝和胃、改善食欲不振等功效，莫非吳局長近期好大壓力？
卓妮同場仲見到抽住一袋二袋懷舊食品嘅海關關長張雲正，原來佢係買嚟孝敬年過九十歲嘅媽媽。佢話張媽媽以前過年成日都整好多傳統食品，但依家年紀大唔再整喇，所以佢就買返去畀媽媽食，順便一齊緬懷吓以前媽媽拖住佢去工展會嘅溫馨時光咁話。
施榮懷帶囡囡湊熱鬧
好溫馨嘅仲有中華廠商聯合會會長施榮懷（Irons）夫婦及細女，Irons細女施曉雯（Charmaine）長得亭亭玉立。Irons話細個爸爸施子清每年都帶佢行工展會，所以依家佢都希望帶囡囡到場湊熱鬧，希望工展會一代傳一代。而工展會作為年度盛事，唔少得廠商會一班高層捧場啦，大家都希望今年入場人次及商戶生意額都再創佳績。
卓妮